Sverrir Páll Erlendsson

Hélt áfram að saga og skrúfa í dag, þetta mjakast en tekur tíma. Stefán Þór kom heill og glaður í heimsókn og við drukkum kaffisopa á grænu stólunum við lítið tekkborð. Þetta eru húsgögn af Móaflötinni - og þetta var fyrsta kaffið á pallinum í Hálsakoti. Frábært - og sólin lét sjá sig á meðan. Hér sést á myndum hvernig var þegar ég hætti í kvöld og samanburðurinn er við myndirnar frá í gær.

Ég er sem sagt byrjaður að klæða frá enda til enda, meðfram öllu húsinu og á báða bóga.

Þarna sést þetta ofan úr hlíðinni. Og það er talsvert eftir  

Í morgun byrjaði ég að klæða pallinn í Hálsakoti. Reyndar var komið nærri hádegi þegar ég byrjaði á þessu, var fyrst að ganga frá festingum á undirlaginu. Timbrið er svolítið frjálslegt í vexti, misbreiðar fjalir og misblautar. Spurning hvernig þetta verður þegar það hefur jafnað sig. Ég reyni að leggja þetta mjög nákvæmlega með jöfnu bili og það má segja að maður þurfi að forma hverja spýtu eins og í bátasmíði. Við þetta verk varð til einn málsáttur: Ekki eru allar spýtur úr einu tré. En hér eru myndir:

Hér litið til aðaldyra. Þetta er hátt í 10 metra frá brún að dyrum.

Í hina áttina.

Og þarna gerði ég eitthvað sem ég hef ekki gert áður, tók mynd af mér með sjálftakara. Sem sagt þreyttur gervismiður að loknum vinnudegi. Meira siðar.

Til er fólk sem ekki er með Facebook. Ég hef gleymt því og fregnir úr Hálsakoti hafa verið strjálli hér en gott má telja. Hálsakot er indæll staður, þar er gott að vera, þar sef ég betur en annars staðar og þar hef ég verið meira og minna með annan fótinn eða báða í sumar.

Ég hef verið svo lánsamur að fá góðan meistara í að vinna með mér að því að smíða pall. Árni heitir hann Sigurðsson, en Stefán Sveinbjörnsson hefur með snilld sinni hlaðið með mér vegi og komið möl og undirstöðum palls á sína staði.

Séð út um stofudyrnar

Framhliðin. Þarna er pláss fyrir meiriháttar ball með grilli.

Þetta er dálítið skekkt og sýnist hærra en það er, en myndin er samt góð :)

Í gær og í dag hafa Árni og Jói frá Rifkelsstöðum verið hjá mér og mikið hefur orðið úr verki. Búið að bolta og ganga frá öllum dregurum og staurum við pallinn, sem aðeins hefur vaxið í höndunum á okkur. Á myndunum hér má sjá hvernig þetta leit úr í dagslok. Þarna er búið að stilla upp fírtommunni sem klæðningin verður fest ofan á þarna fyrir framan húsið. Staurar eru enn mjög misháir og það á eftir að saga ýmsa enda, en þarna ætti að sjást í stórum dráttum hvernig þetta verður. Sumt af rýminu undir pallinum verður klætt af en annað nýtt sem útigeymslur eða útiskýli. Þetta verður allt talsvert miklu smekklegra en það sýnist svona í miðju kafi - en pallurinn er að verða staðreynd og það gleður mig ákvaflega.

Ég grét af gleði þegar ég heyrði nýjasta sumarsmellinn frá Baggalúti, Saman við á ný. Það er ekki einasta að Bragi skáld setji saman texta sem sameinar á einum stað allt það sem felst í sumarsmellum sunnlenskra dægurlagasveita svo hver einasta lína snertir mann, heldur hefur Guðmundur tenór náð að fella rödd sína nær fullkomlega að röddum söngvara flestra þessara sveita og það er að sönnu Magnaður Hreimur. Ég kemst ekki hjá þvi að birta hér, algerlega í leyfisleysi, ljóð Baggalúts með skýringum hans sjálfs, en lagið má heyra hér: http://baggalutur.is/

SAMAN VIÐ Á NÝ
Laufléttur sumarsmellur 
Baggalúts 2009
 
Baggalútur hefur sent frá sér glóðvolgan sumarslagara af gamla skólanum. Stuðst er við öll helstu einkenni hins ægigrípandi séríslenska hásumarsmells, til að ná fram sem sterkustum áhrifum og til að gera upplifun áheyrandans sem eðlilegasta og þægilegasta.
 
Textinn er byggður á nýfundnu kvæði dægurskáldsins Jónasar Hallgrímssonar „Saman vér hér á ný“ – sem talið er með elstu kvæðum höfundar. Er mál manna að hér gæti jafnvel verið á ferðinni nýtt „Stóð ég útí tunglsljósi“, sem var síðasti stóri smellur Jónasar.
 
Lagið er eftir Braga Breezer. Gummi Pelz syngur. Kalli Boeing og Kiddi Kweiz. radda. Stóri G þenur gítar. Kiddinatorinn refsar húðum. Siggi Jammæka kroppar bassa og farfísu. Kiddi 799 stýrði upptökum.
 
SAMAN VIÐ Á NÝ
 
Sitjum hér þú og ég

alltaf hér, enn á ný.

Förum saman út í geim

förum saman hér á ný.
 
Ekki fara frá mér hér

alltaf vera hér hjá mér.

Svífum saman þú og ég

saman hér, við á ný.
 
Því það er komið sumar

það er komið sól

þú ert hérna hjá mér

ég er hérna hjá þér

verum bæði saman
– saman hér á ný

saman, við á ný.
 
Hjartað brennur hér í kvöld,

verum saman tvö á ný.

Á stjörnufjöld við horfum á

saman þú og ég þér hjá.
 
Verum saman alltaf tvö,

ekki fara frá mér hér.

Fljúgum áfram saman nú.

Saman tvö, við á ný.
 
Og ég elska þig og bara þig
og aðeins þig og eina þig að eilífu

því ég veit að þú munt elska mig
og bara mig og bara mig að eilífu!

Ég held svei mér þá að sé ekki hægt að gera betur. Þetta er hið fullkomna sumarlag.

Takk, Baggalútur, takk!

Á timabili var ég að velta fyrir mér að réttast væri að breyta nafni Hálsakots í Grjóttún, Grjótgarð, Steinholt eða Björg. Þetta var meðan við Stefán Sveinbjörnsson vorum að hlaða grjótagarðana við Hálsakot, sem eru að sumu leyti til skrauts og yndis en að öðru leyti til að hemja mölina sem er utan með húsinu og þar í eru svo undirstöður pallsins. Þetta var skemmtilegt verk og vannst furðurvel, Stefán lipur með vélarnar og ég reyndi að mjaka steinum til með járnkarli og moka möl að baki þeim með gömli malarskóflunni hans pabba. Og fylla svo í skörðin og fleyga í rifur.

Fyrst gerðum við vegginn við kjallaradyrnar. Hann er ágætis púsl og tókst vel, finnst mér. Sterklegur og fallegur.

Eftir svolítið hlé tókum við okkur svo til að hlóðum meira, garð sem er hæstur við innganginn að húsinu, hjá honum verðu farið upp á talsverðan malarpall, sem er ekki tilbúinn.

Garðurinn lækkar svo til vesturs en heldur jarðveginum að suðurhliðinni og meginstoðunum undir stærsta fleti pallsins.

Þessi lági garður heldur svo áfram allt að kjallaradyrunum og tengist þannig háa veggnum þar.

Síðan þetta var tekið er búið að koma fyrir öllum undirstöðum pallsins og steypa festingarnar. Í vikunni eftir Fiskidag á ég svo von á að fá Árna smið til að ganga frá burðarvirkinu og bolta þetta allt saman fast svo ég geti farið að sauma klæðninguna á pallinn. Það verður gaman.

Eftir prýðileg hlýindi sumarsins og mikla þurrka kom skyndilegt kuldakast, snjóaði til fjalla og allt það.

Í morgun tókum við Stefán til við að hlaða stórum steinum, flytja möl og koma fyrir rörum undir uppistöður pallsins í Hálsakoti. Þetta var afar ljúft, sólskin og fegurðin engu lík framan af, logn á polli og allt hvað heitir. Síðan tóku að dragast upp ský og hafgolunni var skyndilega startað og hún var fjandi köld. Svo tóku að sjást regnský og svartir bakkar inni í Eyjajarðardölum og þetta barst hægt og hægt út fjörðinn.

Eins og hendi væri veifað skall á okkur haglél. Þetta var gróft, það var engu líkara en sáð hefði verið grófu salti yfir allt. Þetta var svo þétt og mikið að þakrennan fylltist og það rann fram yfir hana. Þar sem ekki var renna var snjóhvít rönd af hagli meðfram húsinu. Bíllinn var eins og á vetrarmorgni.

Við hættum að vinna, enda liðið á dag, en skömmu síðar breytist úrkoman í venjulega rigningu, sem var mjög þörf gróðrinum, en hitinn var lágur þarna uppfrá, 4-5 stig, og það er náttúrulega ekki það besta fyrir gróðurionn. En þetta er bara stutt, það verður besta veður á morgun - eða hinn - eða hinn :)

Núna á vordögum gengu ungir og áhugasamir menn til liðs við fréttavefinn akureyri.net og gerðu á honum afgerandi andlitslyftingu og hófu fréttaþjónustu af miklum móði, bæði ritaðar fréttir af málefnum sem tengjast Akureyri og næsta nágenni og síðan fréttaskot og annað efni í lifandi myndum. Ég verð að segja að mér þótti þetta afar vel gert hjá þeim og fygldist reglulega með. Þarna fóru jöfnum höndum almennar fréttir, fréttir af pólitík og þvi sem helst var að gerast í menningar- íþrótta- og afþreyingarmálum. Mér fannst þetta vera það sem hér vantaði, ekki síst af því að landsfjölmiðlarnir eru eiginlega hættir að þjóna landsbyggðinni. Ríkisútvarpið virðist forðast Norðuland, Mogginn er búinn að fella niður Akureyrarsíðuna og landsbygð hefur aldrei átt upp á pallborðið hjá Fréttablaðinu eða öðrum miðlum á þeim snaganum.

Þegar líða tók fram á sumar fannst mér að vísu fækka fréttum á akureyri.net og núna um daginn þegar ég brá mér til útlanda og ætlaði að fylgjast með því sem gerðist heima ef ég komst í tölvu var eins og væri búið að slökkva á vélunum. Ég bar mig aumlega upp við ritstjórana og komst að því að þeir eru báðir komnir til annarra starfa og akureyri.net orðið að frístundastarfi á ný. Ástæðan er sú, að mér skilst, að þessi frábæri og nauðynlegi fréttavefur, sem hefur notið mjög mikilla vinsælda miðað við notendatalningu hefur enga styrktaraðila. Það er að segja, það gengur  ekki neitt að fá auglýsingar á vefinn ef þarf að borga fyrir þær. Allir virðast vilja láta um sig getið en enginn tilbúinn að borga fyrir það. Það liggur í augum uppi að slíkur rekstur getur ekki gengið og til þess að geta sinnt svona merkilegum vef þarf að hafa starfsmenn sem geta fengið laun fyrir störf sín.

Einasta leiðin til að hægt sé að spýta lífi á ný í þennan gagnmerka fréttavef er að hagsmunaaðilar séu tilbúnir að auglýsa á honum eða styrkja hann með öðru móti. Ef það gerist ekki getum við ekki fengið að fylgjast á vef með því sem gerist þegar það gerist. Nútíminn ætlast til þess að sú þjónusta sé fyrir hendi. Og fjöregg akureyri.net er fólgið í höndum auglýsenda.

Það er ekki dónalegt að fá svona falleg bréf og það er líka dásamlegt að vita að tölvuöldin hefur fært okkur heim einfaldar og traustar leiðir til að snara texta milli tungumála.

Hér er bréfið:

Yndi Vinur
ÉG vita this skilaboð vilja koma til þú eins og a koma á óvart eins og
við gera ekki vita hvor annan í manneskja en sökum the náttúran af
this viðskipti hver ég er óður í til afhjúpa til þú , ég velja til
snerting þú um email til leita að fyrir þinn samþykki fyrir félag
fyrir okkur til framkvæma a framkvæmd þessi vilja vera gagnlegur til
báðir af okkur. Áður ég halda áfram , Minn Nafn Er Herra. Andrew
Philips a Bretar Borgari ÉG er the tilbúinn til notkunar
framkvæmdastjóri af Citibank Plc. Oxford Grein hér í London Uk. Á
meðan okkar anual bankarekstur hæfnispróf hver took staður á the
þriðji af this mánuður (3rd Júní 2009) við uppgötva a gríðarstór summa
af peningar vinstri í a sofandi reikningur fyrir yfir sjö ár (7 ár )
án allir líkami óperu- á the reikningur eftir á futher rannsókn á the
reikningur , við stofna út þessi the reikningur eiga að vera til einn
af okkar erlendur fjárfestir ( herra. George Leen ) hver því miður
glataður hans líf saman með hans eiginkona í a brotlending í the ár
2002 á a frí ferðalag til Bandaríkin. According to til minn banki
stýrikerfi og siðfræði svo sem sofandi reikningur vilja vera gera
upptækan og the sjóður vilja vera hús inn í the banki ósóttur
reikningur fyrir banki nota ef enginn koma upp eins og the arfþegi.

Eins og þú mega vilja til vita , Herra. George Leen innborgun this
peningar til okkar banki providing that enginn eins og the arfþegi.
Minn val af snerting þú vekja undirstaða á the náttúran af this
framkvæmd hver þurfa a útlendingur áður the sjóður geta vera gefa út
og minn aðalæð tilgangur er til nútíminn þú til the banki eins og the
ættingi svo þessi the sjóður virði af sextán milljón fimm hundrað
þúsund Sameinaður Stjórnvitringur Dollari geta vera greiddur til þú
eins og the arfþegi fyrir okkar gagnkvæmur hagur. á the endir af this
framkvæmd the sjóður vilja vera hluti sextíu prósent (60) til mig og
fjórði prósent (40) til þú. Þóknast ef þú ert áhugasamur í minn tilboð
vingjarnlegur ná sér niðri á til mig þegar í stað eftir á lestur this
skilaboð með the hópur stuðningsmanna smáatriði niðri :

Þinn Fullur Nafn
Þinn Aldur
Þinn Atvinna
Þinn Snerting Heimilisfang
Þinn Persónulegur Hreyfanlegur Sími Tala

Í kvittun af the yfir þurfa upplýsingar vilja búa húsgögnum þú með
fleiri smáatriði og the halda áfram fyrir framkvæmd this verkefni
aleiga mín þörf er þinn skilningur co - gangur og gæsla this framkvæmd
toppur leyndarmál og leynilegur þangað til við ert. Eins og þú mega
vilja til vita ég hafa allur the lífsnauðsynlegur upplýsingar til
styðja this krafa og með the áhrif af minn staða í the banki við vilja
ljúka this framkvæmd án allir hindrun.

Bíða eftir þinn áríðandi svar

Takk
Herra. Andrew Philips

Það hefur bara gleymst að þýða nafnið Andrés Filippusson.