Gakktu inn
í grashólinn þinn
ungi maður
á sauðskinnsskónum,
stingdu tölvunni þinni
í samband við moldarvegginn
skammt frá langeldinum
og talaðu við heiminn
Taktu síðan móköggul
eða svarðarflögu
í latexklædda lófa þína,
gakktu inn í
steinsteypta hitaveituveröld
þína,
leggðu byrðina frá þér
á marmaraklætt
eldhúsgólfið.
Hengdu læri lambs
í halogenljósið í loftinu,
tendraðu glóð
í mó eða sverði
og bíddu
með handfrjálsan síma í eyra,
fartölvu í kjöltu,
og Quarashi í græjunum
uns hangiketið
verður lagt á borð.
