8-10 súputeningar (eða jafngildi þeirra af nautakjötskrafti)
8 bollar af soðnu vatni
15-20 stór hvítlauksrif (2-3 venjulegir hvítlaukar úr netpoka)
2 msk. smjör
2 msk. söxuð steinsela
1 msk, hveiti
¼ tsk. nýmulinn pipar
6 eggjarauður, hrærðar
6 litlar sneiðar af ristuðu brauði
Bragðmikill ostur, t.d. Óðalsostur
Setjið soðið vatnið í skál og leysið upp kjötkraftinn í því.
Takið utan af hvítlauknum og saxið hann smátt. Látið hann síðan ásamt steinseljunni krauma í smjörinu í potti við lágan hita. Gætið þess að þetta brenni ekki við. Bætið hveitinu út í og leyfið þessu að brúnast stundarkorn.
Hellið soðinu með kjötkraftinum út í pottinn, bætið piparnum út í og látið malla að minnsta kosti í hálftíma, jafnvel upp undir klukkutíma.
Rétt áður en súpan er tekin af hellunni, hellið eggjarauðunum smátt og smátt út í og hrærið varlega.
Setjið súpuna í eldfastar skálar, leggið eina brauðsneið með osti ofan á súpuna og bregðið þessu undir grill eða í snarpheitan ofn svo osturinn bráðni.
Uppskriftin er ætluð 6-8 manns.
(Þessi uppskrift er úr hvítlaukshéraðinu Gilroy í Kaliforníu)
