Sverrir Páll Erlendsson

Döðlur vafðar með beikoni, helst fitulitlu. ég notaði ítalskt Fiorucci, Speck.
Settar saman tvær og tvær á tannstöngul.
brúnað i smjöri.
kælt.

Risarækjur látnar liggja í baði af olíu og miklum pressuðum hvítlauk
léttsteikt  og kælt

Teskeið full af laxahrognum frá Svalbarðsströnd látin á disk, ein döðlutvenna og 2-3 rækjur með. 

Einfalt en býsna gott. 

EFNI
-½ kg rækjur
-¼-½ dós Aspargus, smátt skorinn
-125 g sveppir, smekklega brytjaðir
-3 tómatar, saxaðir smátt
-1 höfuð Icebergsalat, saxað

Þetta er allt sett saman í skál og blandað varlega.

LÖGUR:
-8 msk. góð matarolía
-4 msk. eplaedik
-2-3 hvítlauksrif örsmátt söxuð
-salt og pipar

Hrært vel saman og hellt yfir það sem í skálinni er skömmu fyrir notkun.

SÓSA:
-1 dl majonaise
-1 dl þeyttur rjómi
-1 dl tómatsósa
-1-2 msk sherry
-1½ tsk karry
-1 msk steinselja

Allt hrært saman. Sósan borin fram í sérstakri skál svo allir geti fengið sér eins og þeim hentar út á réttinn.

Borðist með ristuðu brauði, t.d. hálfum sneiðum horn í horn.  

500 g rækjur, mega vera smáar
1 græn paprika
1 rauð paprika
10 hreðkur - æi nei, radísur
3-4 meðalstórir sveppir
½-1 hvítlaukur hvítlauksrif
1 laukur
1/3 glas jalapeno pipar (nacho sliced)
3 msk. jómfrúarolía
5 msk. balsamedik

Rækjurnar þíddar.

Allt grænmetið skorið afar fínt og blandað saman í skál.  Olíu og balsamediki hellt yfir og hrært vel.   Rækjurnar settar út í og blandað vel saman.

Geymist í kæli.  Borðist með ristuðu brauði eða kexi.

500 g rækjur
500 g hörpuskelfiskur
2 tsk karrý
2 hvítlauksrif
cayanepipar
6 msk. tómatsósa
2 msk. soyasósa
smjörlíki
rjómi
sósujafnari

Smjörlíki brætt og hvítlaukurinn látinn meyrna í því.

Fiskmetið sett út í ásamt kryddinu og loks sósunum og rjómanum og látið krauma í andartak.   Sósujafnari settur út í eftir þörfum.

Gott með ristuðu brauði.

500 g rækjur
1 dós kræklingar (Musselsalad)
2-3 tómatar
1 græn paprika
1-2 ferskar perur
½ góð melóna
blá vínber

Sósan:
2 hlutar sýrður rjómi
1 hluti mæjónes
örlítil HP Fruity-sósa
tómatsósa eftir smekk
karrí eftir smekk

Rækjurnar og kræklingurinn sett í skál.
Ávextir og grænmeti saxað og blandað saman við.

Sósuefnið hrært vel saman og sósan síðan sett út í blönduna og hrært vel.
Verulega gott með góðu, ristuðu brauði eða heimabökuðu brauði eða bollum.

Hrísgrjónin
1-2 msk. olía
1 tsk sterkt karrí
2 bollar jasmín-hrísgrjón
2 tsk. tandori masala
5 bollar vatn

Olían hituð á pönnu. Kryddið sett út í og látið brúnast dálitla stund. Hrísgrjónin sett út í og steikt uns þau byrja að hvítna. Vatnið sett út í og grjónin látin sjóða í 5 mínútur eða svo. Slökkt á hellunni en pannan látin standa á henni með loki í 10-15 mínútur. Grjónin þá hrærð upp og losuð og kæld.

1-2 gulrætur
6-8 radísur
1 rauð paprika

Gulrætur og radísur sneiddar ÖRÞUNNT. Paprikan brytjuð smátt. Sett út í grjónin þegar þau eru orðin sæmilega köld.
 

Skeldýrin
2 dósir kræklingur
1 dós sniglar (fást í Hagkaup og KEA sáluga)
500 g rækjur
4-5 hvítlauksrif pressuð
Smjörklípa

Sniglarnir teknir úr dósinni og baðaðir í hvítlauksmaukinu dálitla stund. Smjörið hitað á pönnu. Sniglarnir steiktir stutta stund. Kræklingnum bætt út í varlega og svo rækjunum. Tekið af pönnu og látið standa dágóða stund og kólna. Hrært út í grjónin þegar allt er orðið kalt

Sósan
1 ds. sýrður rjómi
250 g mæjónes
1 msk sinnep
2 tsk. hunang
1 tsk. sterkt karrí
2 mask portvín

Sýður rjómi og mæjónes hrært saman og sinnepi blandað saman við. Karrí og hunang sett saman við og að lokum portvínið.

Þetta er gott með brauði - ekki síst ristuðu.